Un xuíz do Xulgado de Instrución número 2 de Vigo decreta que se continúe coa tramitación do procedemento aberto contra Carlos Gómez, alcalde de Baiona, por un
delito de continuado de prevaricación administrativa e de falsidade documental. O xuíz ve indicios de que, presuntamente, simulou ter unha licenza de estacionamento para sacarse cinco multas por aparcar nunha zona de carga e descarga.

O Bloque Nacionalista Galego en Baiona ven de ratificar a súa posición xa amosada en sesión plenaria: “Dende o punto de vista ético e moral non compartimos que o Sr. Alcalde de Baiona, Carlos Gómez, utilice unha zona habilitada para vehículos autorizados, Policía Local ou destinada para carga e descarga. Así llo trasladamos a el no seu momento e dixémolo en sesión plenaria”, afirma o seu portavoz, Iago Pereira.

“Somos conscientes de que o Alcalde, polo que supón o cargo en si, ten unha axenda apertada e precisa dun espazo para estacionar o coche que lle permita eficiencia e axilidade para chegar ao Concello. Entendemos que o Aparcadoiro Municipal do Aral cumpre perfectamente estes requisitos”, continuaba o portavoz nacionalista.

En canto ao proceso xudicial aberto por un delito de continuado de prevaricación administrativa e de falsidade documental contra o Sr. Carlos Gómez, “O proceso está aberto e compre agardar a que a xustiza faga o seu traballo e, tendo sempre en conta a presunción de inocencia, temos que agardar pola sentenza do xuíz”, concluía Iago Pereira.