Empresas de taxación de vivendas e portais especializados en venta veñen de confirmar recentemente que Baiona xa é o concello galego máis caro para comprar unha vivenda. Lidera esta clasificación cun custe medio de 2.850 €/m² superando a Sanxenxo (2.845 €/m²), e as grandes cidades do país: A Coruña (2.737 €/m²), Santiago (2.555 €/m²), Vigo (2.475 €/m²) ou Pontevedra (2.210 €/m²)

O Bloque Nacionalista Galego esixe á Xunta de Galiza actuar con urxencia ante a cada vez maior dificultade das baionesas e baioneses para acceder a unha vivenda xa que, con este prezo, a compra dunha vivenda de 70 m² chega a 200.000 € e unha de 100 m² alcanza os 285.000 €. Estes prezos son prohibitivos para a grande maioría das persoas en xeral, e para a mocidade en particular.

Os nacionalistas apuntan que a falla de planificación urbanística, a presión dos pisos turísticos e a constante inacción por parte do Partido Popular producen este grave problema. Así, Baiona conta con máis de 1.000 vivendas desocupadas e máis de 2.000 residencias secundarias.

O BNG sinala como fundamental ordenar e aumentar o parque público, ben sexa mediante nova construción ou mediante a adquisición de inmóbeis sen uso, como alternativa para solucionar este problema residencial que expulsa e dificulta, cada vez máis, á veciñanza de Baiona poder vivir no seu concello.